Englafjárfestar

Englafjárfestar gegna lykilhlutverki í vistkerfi nýsköpunar. Þeir koma að borðinu snemma – áður en hefðbundnir fjármögnunarmöguleikar eru í boði – og styðja frumkvöðla með fjármagni og þekkingu.

Englafjárfestar:

• Deila þekkingu og reynslu úr atvinnulífinu
• Tengja frumkvöðla við rétta aðila og tengslanet
• Veita leiðsögn og styðja við stefnumótun
• Hjálpa til við að byggja fyrirtæki sem eru tilbúin til vaxtar og frekari fjármögnunar

Þeir eru oft fyrstu trúnaðarmenn frumkvöðla og styðja við bakið á hugmyndum sem annars gætu ekki orðið að veruleika. Með því að taka þátt í áhættusömum, en spennandi verkefnum, skapa englafjárfestar verðmæti – ekki aðeins fyrir sjálfa sig, heldur einnig fyrir samfélagið og hagkerfið í heild.

Englafjárfestingar eiga sér oft stað á fyrstu stigum sprotafyrirtækis – þegar hugmyndin er tilbúin og frumkvöðullinn að hefja vegferðina.

1. Kynning

Frumkvöðull kynnir hugmynd sína og framtíðarsýn – oft í gegnum pitch viðburði sem stuðningsaðilar og samtök eins og IceBAN halda.

2. Mat og greining

Englafjárfestir metur viðskiptahugmyndina, teymið, markaðinn og áhættuna – með mögulegan arð og áhrif í huga.

3. Fjárfesting

Ef fjárfestir sér tækifæri í verkefninu og ber traust til teymisins, er næsta skref að kaupa hlut í félaginu. Algengar fjárhæðir eru á bilinu 1–20 milljónir króna, en það fer eftir umfangi og eðli verkefnisins.

4. Stuðningur og þátttaka

Fjárfestir veitir ráðgjöf, opnar dyr að tengslaneti og styður frumkvöðulinn í að taka næstu skref – hvort sem það er í vöruþróun, markaðssetningu eða frekari fjármögnun.

5. Útganga og ávöxtun

Ef fyrirtækið vex og eflist, getur fjárfestir síðar selt sinn hlut – t.d. til stærri fjárfesta eða í yfirtöku. Markmiðið er oft að fá margfalda ávöxtun á upphaflega fjárfestingu.